مساء الخير
تقييمي لتجربة منصة الويب إيجابي في المجمل مع التأكيد اني اصلا شخص بحب التداول على الموبايل وممكن انقل للويب لو لقيت عليه اضافات مهمة مش موجودة في الابلكيشن ودا الحقيقة مش موجود في المنصة التجريبية اللي هي عبارة عن نفس تطبيق الموبايل بس مفرود ومستغل المساحة اللي بيوفرها الويب، في فرق في السرعة سواء التنقل بين الصفحات او في وضع الاوامر او تحديث الارقام واضحة جدا، لسه مفيش تحليلات حتى تحليل ثاندر اللي بالنقط مش موجود محتاجين نستغل الويب علشان نوفر عليه حاجات تريح العملاء وتخفف الضغط على الدعم زي مثلا طلب كشف حساب، طبعا لسه المحفظة مش موجودة افتكر لانه في المرحلة التجريبية

--عملية الlog in صعبة اتمني يكون دا الفترة التجريبية بس، احنا كنا بنشتكي ان في الابلكيشن محتاج ادخل كلمة السر كل شوية وفرحنا باستخدام البصمة لفتح الابلكيشن، الويب المفروض يكون حل بديل للموبايل ابلكيشن (الموبايل مش شغال، قاطع شحن، مفيش وايفاي او داتا) وبالتالي فتح الويب من خلال تفعيله من الموبايل كل مرة مش منطقي

-- الصفحة الاولي كويسة اوي، نفس الصفحة الاصلية اللي كانت على الابلكيشن واتغيرت كذا مرة، كمان استفادت من المساحة في الويب وكل الخيارات الخاصة بالاسهم موجودة (عدد الاسهم، متوسط السعر، اخر سعر تنفيذ، التغير اليومي، قيمة الاسهم الحالية، الخسارة او الربح في كل سهم)

-- لو في فرصة ان يكون في اوبشن dark mode الابيض مش مريح خالص وفي تفاصيل مش باينه على الاقل بالنسبة ليه (مثلا اخدت وقت على ما فهمت ان في زرار تحت ايقونة الحساب الافتراضي علشان اقدر ادخل فيه)

-- صفحة الاوامر كمان مريحة بس لسه مفيش فاتورة للامر اللي اتنفذ بتطلع ودي مهمة، ونفس الموضوع بالنسبة للون الابيض اخدت وقت على ما لقيت اوبشن تصفية الاوامر من المعلقة والمنفذة والملغية

-- صفحة كل سهم بسيطة زي الابلكيشن ووجود اوبشن تغيير الشارت من خطي لشموع يابانية لطيف بس الحقيقة الشموع مش هدف بصري في حد ذاته ولكن هي مرتبطة بادوات التحليل اللي مش موجودة، باقي البيانات اللي موجودة على الاسهم بسيطة زي ما هي مفيش جديد

--اوامر البيع والشراء بسيطة بس مفيش اوبشن زي تحديد مبلغ لشراء اكبر عدد من الاسهم بسعر السوق او معرفة الحد الاقصي للاسهم اللي اقدر اشتريها على حسب المبلغ في المحفظة مش موجود ومحتاج اقعد اجرب او احسب على اله حاسبة